-مشاهدينا الاعزاء.. مساء الخير.. معانا ومعاكم في برنامجكم المُفضل (أسألني من انا) عفريت من الجن الاحمر.. مساء الخير استاذ جني.. ممكن نتعرف بيك؟!
-مساء الفل يااوساذة.. اخوكي بُقلظ ابو جحيم.
-وابو جحيم ده لقب شهرة ولا لقب الأسرة؟!
-لا الحقيقة.. لا ده ولا ده.. الناس بيقولوا لي كده عشان انا عندي ابن اسمه جحيم.. هو اصلًا ماسموش جحيم، اسمه حماصة عادي، انما العيال بتقوله ياجحيم اكمنه يعني عيل مخلص.. مس تلاقي، أذية شغال، من الأخر، عيل ابن جنية.
-ابن جنية!.. لا لا لا.. ماسمحش لحضرتك انك تهين المرأة، حتى لو كانت المراة دي زوجتك او حتى لو على سبيل الدُعابة.
-ياستي دُعابة ايه ومرأة مين اللي اهينها، انتي هتلبسيني مصيبة مع بتوع النسويات ولا ايه، انا بقول انه ابن جنية بجد، امه فعلًا جنية.
-ااه.. فهمت.. ما علينا.. استاذ جني.. ايه اكتر الأشياء اللي بتخليك مُستاء من عالم البشر؟!
-الحقيقة يااستاذة الموضوع ده مليان كلام كتير، موضوع كده تحسيه مظفلط ومالوش مالكة.
-هو ايه ده اللي مظفلط مالوش مالكة!.. ماتحترم نفسك يااستاذ.
-جرى ايه ياست انتي.. انا اقصد الموضوع، ثم انا اصلًا مافهمتش سؤالك، وعشان كده بنحكش في اي كلام.
-بتحنكش!.. لا لا.. انا لا أقبل مثل هذه المصطلحات في برنامجي، اتفضل جاوب على السؤال، وبدون حنكشة لو سمحت.
-طب ما تسألي ام السؤال بكلام سهل عشان افهمه واعرف اجاوبه.. مش تقوليلي مُستاء وبولاق.. خشي في الدوغري عشان اجي معاكي عدل.
-لوكال اووي..
-الله يحفظك.. اسألي بقى ام السؤال خليني اخلص الحلقة واروح الحق اجيب البت بنتي عشان زمانها قربت تخرج من المدرسة.
-مدرسة ايه دلوقتي؟!.. الساعة ١٠ بالليل.
-ياستي ما انا عفريت.. تحبي اثبتلك.. بخخخ.. يعني المدارس عندنا غير عندكوا.. في فرق توقيت… خلصي واسأاالي ام السؤال عايز انصرف.
-حاضر.. ايه اكتر الحاجات اللي بتخليك متضايق من عالم البشر؟
-كذا حاجة، مش حاجة واحدة بس…
-احب اعرفهم لو سمحت.
-أولًا الناس اللي مابتسميش قبل ما بتاكل عدس، الناس دي غير انها بتشيل ذنوب لانها مابتسميش، فهم كمان هيشيلوا ذنب تعبي بسببهم… يرضيكي كل يوم والتاني اروح اعمل غسيل معدة عشان كلت عدس وانا مابحبوش؟!
-لأ مايرضنيش.. طب وايه تاني اللي بيضايقك في عالم البشر؟
-الناس اللي بتدخل الحمام الساعة واحدة بالليل ويفضلوا قاعدين وهم بيغنوا.. ياباااي ع الغتاتة، يعني مش كفاية انهم بيدخلوا يقرفونا بالليل، لا وكمان بيغنوا وهم صوتهم وحش.. الواحد من دول بيفكر انه عنبة ولا حمو بيكا وهو صوته عامل شبه صوت شواحة.
-مين الناس دي يااستاذ قلبظ؟!
-قلبظ ايه ياست الكل.. اسمي بقلظ.. وبعدين الناس دي أعلام في الغنا الشعبي، انتي مابتركبيش تكاتك ولا ايه؟!
-لا الحقيقة مابركبش..
-اااه.. وهنا نيجي لتالت حاجة بتضايقني منكوا.. الناس اللي شبهك كده، الله يسامحهم بقى، شوهوا صورتنا بمصطلحاتهم، تخيلي اني طلعت لواحد قبل كده وقالي ياجوست؟!.. انا على الأخر الزمن يتقالي ياجوست؟
-بس جوست دي مش حاجة وحشة.. دي ترجمة لانك عفريت او شبح.
-ترجمة ايه ونيلة ايه.. هو انا طلعت لاسلام الجيزاوي عشان يترجملي كلمة عفريت.. ما تقولوا عفريت زي خلق الله، ولا لازم يعني عوجة اللسان عشان تبانوا انكوا روشين وبتاع؟!
-اوس اوس.. اوستاذ قلبظ.. انت ودانك بتطلع دخان كده ليه؟!
-اتعصبت بصراحة.. ده انتوا خلق ماتتعاشروش.
-لا انا عاوزاك تهدا كده لحد ما نخلص الحلقة، هانت.. فاضل سؤال اخير.. وسؤالنا الاخير للاستاذ.. تفتكر الكلام اللي بيتقال عنكوا صح؟!
-ولا اي صح.. كله هري.. يعني مثلًا الواحد ولا الواحدة من دول يشوفولهم حلم مش ولابُد.. ولما يصحوا يقولوا لك جني ولا جنية عاشقة.. جرى ايه.. ما تحترموا نفسكوا بقى.. احنا مش ملطشة يااستاذة.. يعني انا اسيب عفريتتي حبيبتي ام قرون صغيرة، واجي اطلع لواحدة منكوا بشعر شبه سلك المواعين؟!.. ليه يعني، اتجننت في نفوخي؟.. لا والا اللي يقولك اننا بنفتح مقابر جواها كنوز!.. ياابني ياحبيبي لو احنا بنعرف نفتح مقابر وكنوز، كان زماننا اشترينا شركة التفاحة بتاعت التلافونات ولا عالأقل خدنا توكيل عربيات.. احنا مش شغالين عندكوا في وزارة الأثار.. يااستاذة احنا غلاابة وكل اللي بيتقال علينا اوشاعاات.. ثم ايه شُبيك لُبيك دي؟!، وقال ايه لما تقولهالنا، بننفذلكوا طلباتكوا في وقتها.. ليه يعني؟!، ده الدليڤري بياخد وقت اكتر من كده.. عيب عليكوا واحترمونا شوية.. احنا مش هفية.
-اوستاذ عفريت.. انت مالك اتعصبت كده ليه؟!.. اوعى تكون هتلبسني؟!
-هو انتي چاكتة عشان البسك؟!.. ثم انا هسيب كل المزز اللي في الدنيا.. وهلبسك انتي؟!
-ومالي انا يااخويا ان شاء الله.. ما انا حلوة وبيضا ومقلوظة وكل الوسط الفني مقطع نفسه عليا.
-شوفتي.. اهو.. ظهرتي على حقيقتك.. بلاعة وضربت في وشي، وبعدين وسط فني ايه اللي بيقطع نفسه عليكي، ده انتي متجوزة من صاحب القناة عرفي، والناس كلها عارفة كده، اه عارفين، بس ماحدش بيرضى يقولك عشان انتي نجمة والناس ليهم معاكي مصالح وبتاع..
-بتاع!.. شاي بالنعناع ياروح امك.. كااات.. اقفلي ياابني الكاميرا دي.. تعالى ياض.. قال عفريت قال.. ده انا اللي هعفرت اللي جابوك..
-جرى ايه يااستاذة.. انتي قلبتي على حريم العزبة عندنا كده ليه.. استهدي بالله اومال.. ماكنوش ورقتين عرفي دول اللي هيخلوكي تتخلي عن شخصيتك.
-شخصية ياابو شخصية.. انت صدقت انك عفريت بجد يالا ولا ايه.. اقلع الماسك اللي انت لابسه ده ياحبيبي.. كل ده شو وانت قابض تمنه عشان نلم مشاهدات.
-شو ايه ومشاهدات ايه.. انا هختفي… بالسلامة ياشيخة.. بلا قلبة نفوخ.
بيختفني العفريت عشان يظهر من ورا الكاميرا المخرج ويقول للمذيعة اللي قاعدة مبرقة..
-يااستاذة.. الواد اللي هيعمل دور العفريت لسه جاي دلوقتي.. بيقول ان امه كانت بتولد وعشان كده اتأخر.. يااستاذة.. يااستاذة انتي مبرقة على الكرسي اللي قصادك كده ليه؟!
-اومال.. اومال اللي قدامي ده كان مين؟!
-مافيش حد قدامك يااستاذة.. انا كل ده كنت فاكر انك بتعملي بروڤة مع نفسك قبل الحلقة وكده.. وعمومًا ماتقلقيش.. خمس دقايق وهنلبس الواد ونبدأ… يااستاذة.. خدي يااستاذة.. الله!.. هي طلعت تجري من الاستديو ليه؟!
تمت
#محمد_شعبان
#ستديو_الجن
